كل عام وانت الحب يا دب

الدنيا ختيرت وشعرها شايب .. ويا ويلي على الذكريات .. وزين ما اخترت يا شاب ويا شبية "اسف قصدي يا صبية" .. بعرف انه في ناس قاعدين هسا بقراوا الموضوع وعيونهم بدها تخلص الموضوع باسرع ما يمكن خليها تفهم شو بدي منكم .. اووففف وهسا قاعدين بتقوله شو بدو المخلوق منا ؟؟

وبصراحة السبب باني موجود معكم اليوم هو عيد الحب وهوب اشترينا الدب .. الدب المشهور ولي بعبر عن الرومانسية والسياسة المتادولة بين الحبيبين على سنجة مية ..

قعدت احضر اشرطة فيديو قديمة عندي اياها من زمان , اشرطة الي ولاخوتي وقرايبي , وتذكرت ايام الصفاء والنقاء ايام زمان , لما كان بنطلوني ممزوع لاني وانا نازل عن شجرة مسك بفراع ولو شوي ظليت عليها زي الي معلقيني برواز بالصالون .. ايام الملابس البسيطة والتصرفات الغريبة والتواضع .. واحلى اشي لما تشوف نفسك وانت زغير , تتذكر ايام طفولتك , ايام ما كان في القناة الاولى والثانية وبس ولما كنا نلقط محطة الاردن , كنا نهيص ونكيف ونقعد على الفرشات ونستنى حلقة "ابو عواد " وفجاة كبرنا ... وعمر الارض زاد .. والي صار ناصح , ولي صار طويل ولي عقله ظل عقل عصفور منتوف ريشه .. اووففف وناس لليوم عايشة وناس ماتت ..

انتو قاعدين بتقوله , شو بدك منا .. والصراحة وراي مشاغل ومش لاقي الوقت الكافي .. بس هسا , لما تذكرت شكلي وانا زغير شعرت زي تقول غبرة فاتت على عيوني .. وصوريت ارمش بسرعة بدي اثبت لنفسي انه الوقت هذاك راح ومش رايح يرجع ..

كملت الذكريات , وفتحت البوم الصور ,, ومن الصور في مجموعة الي خلتني افقع من الضحك , صورة امي وعمتي وبنت عمتي في احد الاعراس , الماكياج كاين تحفة زي دخنة الارجيلة بهالايام .. وعمتي لابسة فستان عليه برق زي فستان امي بالزبط .. والظاهر كاينة حملة اشتري فستان اسمر مع برق وخذ فستان اسمر برضو مع برق وبرضو لونه اسمر مجانا .. وما حدا يستخف دمه ويسالني اذا الفساتين حلوة . لاني بصراحة شايفها بتجنن لدرجة 42 في ميزان الحرارة , يعني الضحكة الي فلخت ملامح وجهي مش قابلة تستقيل ( بليزز اقيلوها هههه ) ..

وكله مع بعض بفرط ضحك ان كان الصور او اشرطة الفيديو ..

وجينا لليوم وبقوله في اخرى اكم يوم عيد الحب .. او عيد العشاق .. وفعلا انا احترم البشرية على هذا الانتاج الجميل للحفاظ على الحب ... يعني بالاضافة لعيد غرس الاشجار وعيد الام في عنا عيد حب .. ومش غريبة يصير عنا عيد النكتة او عيد الرمشة او عيد الكراهية .. بصير كل واحد يكره واحد يبعثله قنبلة هدية ههههههه او يتصل فيه ويقوله " دير بالك ع حالك انت بتلعب بالنار" .. وبتصير شركات الخليوي تعمل اشكال وصور للتلفونات لمسدسات او وجوه مرعبة مثل هياكل عظمية .. وبكل الاحوال خلينا بعيد الحب او الي انا بسميه عيد الدب ..

لانه وبصراحة اذا بتفوتو على محلات الهدايا بتلاقه نجم السوبر ستار والعالم العربي الميسيو دب قاعد على الرفوف باللون الاحمر وبكثير من الاحيان بكون حامل قلب في ايده فعلا الله يزيده ..

واحنا قال مننزل من السيارة او حتى منروح مشي , على المحلات هذه , وبنفوت قال وبنصير ندور على هدية .. بنصير نفكر ونفكر ونفكر .. ونتخيل شو بدها تعمل الحبيبة لما تفتح الهدية وتقرا الكلمات الماساوية الي حطيناها بالهدية او شو بدو يعمل الحبيب لما يفتح الهدية ..

وتذكرت هذيك اليوم لما كنت سرحان بالهدية الي بدي اقدمها في عيد الحب , ومن كثر التفكير قرطت لساني , وتوجعت اقل شي 4 دقايق متواصلة وانا اتنطنط شمال يمين الى الامام سر , حاضر افندم ..

ويجو علي اخوتي ويقولولي مالاك ؟؟ وانا مش عارف احكي قولتلهم لشاني لشاني عشظيت لشاني ... وكلهم مع بعض قالوا شووووووووووو ؟ اقولهم باكثر وضوح لساني !!!! عشظيت لساني .. وفهمو بالاخر علي اني عظيت لساني .. وبصراحة كنت زغير شوي بالجيل .. والله ايام حلوة بتشعر بحلاوتها بس لما تكبر ..

بس كلو كرمال الحب يهون ..

والدنيا مشت وما وقفت .. والهاتف الخليوي تطور .. وصار باشكال والوان واصلا بالزمناااااااااااااااااا ا اه اه ت بالزمنات ... ما كان خليوي او بليوي .. وكان اول ما طلع حجمه قد حجم البلاطة , كان لازم يساعدك اخوك او ابوك وانت حامله من كثر ما هو ثقيل ..

هذه الدنيا واحنا ماشين معها ..

وبتذكر المسرحيات القديمة الي صار عليها غبرة .. زي العيال كبرت , الواد سيد الشلاغ قصدي الشغال او الزعيم ومدرسة المشاغبين .. ولاووو كثير مسرحيات ..

وافلام الكرتون .. الشجعان الثلاثة , عدنان ولينا , ماوكلي , الكابتن ماجد , نينجا , سالي , ساندي بل , ليدي ليدي , فلونة , هايدي , ماركو , جازورا , ******************************** , والقائمة طويلة ..

وبنرد نرجع للدب ..

الدب , دب الحب .. عامل عمايل .. ومسوي الهوايل .. وبدي اشوف دب واحد بالطبيعة بعرف انه صار شعار للحب .. وانه البنت بتحتفظ فيه عشان تفضفض له عن مشاكلها .. وهات عاد اشوف بنت وحدة بتشوف دب بحديقة الحيوانات وبتسترجي تقرب عليه , ومتاكد مليون بالمية انها لو بس تسمع صوته بجوز تصرخ صرخة تخليه يهج من بيته ..

واحنا عاملين حالنا ناعمين رومانسيين وحاملين هالدب وبنطارد فيه بكل مكان ..

وبنحطه تحت روسنا او على ذنينا وقال يعني متاثرين من الحب .. وبنسمع اغنية بتترك اثر كبير علينا .. اثر بجوز نتذكره لما نكبر .. لما نصير نفكر اعمق من هيك .. وبنشوف قديش كنا مجانين ..

ولازم تعرف في النهاية انه احنا مش بحاجة لدب او قرد او حتى سحلية عشان نثبت قديش بينا العلاقة قوية ..

ويلا صار لازم امشي وبرجوكم ما تكمشوني كمشة ..

تشاو بعلبة كاكاو

تحياتي,,

مشكوووووووووووووووووور

الله لا يحرمنا منك

تقبل مروري
_________________

مشكوووووووووووووووووور

مشكووووووووووووووووووووووووور هههههههههههههههههههههههههههههههههههههه

مشكوررررررررررررررررررررررررررررررررررررررررررررررر

على

المرورررررررررررررررررررررررررررررررررررررررررررررررررر

شكرا الك على المتابعة